ඉහිරුණු ළය කිරි....

මරා විසි කරන්නට නම් - හදන්න‍ට එපා නොදරුවන්
නොමරා අතැර යන්නට - මව් සිතත් දැඩි නම්
ළය කිරට ණය නැතිය - වැදු මව්ට සිතේ නම්
“ලේකැටි මගෙ මුවට - ඇයි ද අම්මේ එකිරි තහනම්”

අයුතු පෙම කැප නම් - අකැප වූයෙද බිළිඳු සුරතල්
කිරි සිනා පවක් මෙන් - පෙනෙනු කෙළෙසද එපෙම් සුව නම්
“රැ‍‍දෙමි සිතුවද මව්ගෙ දෑතින් - ඇයිද අම්මේ මරන්නේ මං”
නුඹේ පෙර පව් කම් - උපන් දරුවන් පි‍ටින් නොයවන්...

අදිසි හස්තය

පන්දම මුට්ටිය උදැල්ල මඩ - ප්‍රධාන චරිත රඟන,
අල්ලස විසින් අධ්‍යක්ෂණය කල - දූෂණය විසින් තිර රචනය කල,
විනිවිදභාවය හා සද්භාවය දුෂ්ටයින් ලෙස පෙනී සිටින,
දේශපාලන වේදිකාව මත
දේශපාලු ආලෝක කරණයෙන් බැබලෙන
VAT  NBT  BTT යන නැරඹුම් පීඨිකා, මහජන රසිකයන්ගෙන් පුරවා ලන
අකමැත්තෙන් වුවත් රසිකයන්ටම අනුග්‍රහය දක්වන්නට සිදු වන
කොච්චර බැලුවත් එපා නොවෙන
එපා වුවත් නිම වෙන්නට පෙර පිට වන්නට නොහැකි
ජන මාධ්‍ය, තිරය පිටුපස රංගනයක නිරත වන
අපූරුම නරි නාටකයකි රාජ්‍ය සේවය.

අපි......

අපි...
ලස්සන හෝ කැත වෙන්නේ අන් අය තමුන්ගෙ පෙනුම ගැන හිතන විදිහට සාපේක්ෂව.
දුප්පත් හෝ පොහොසත් වෙන්නේ අනුන්, තමුන්ගෙ වත්කම ගැන තියෙන ඇස්තමේන්තුවට සාපේක්ෂව.
කළු හෝ සුදු වෙන්නේ අන් අය තමුන්ගෙ හමේ වර්ණය ගැන හිතන විදිහට සාපේක්ෂව.
ඇති හැකි හෝ නැති බැරි අය වෙන්නේ අන් අය තමුන්ගෙ බලපුළුවන්කාරකම ගැන හිතන විදිහට සාපේක්ෂව.
උගත් හෝ නූගත් වෙන්නේ අනෙකා ලබාගත් අධ්‍යාපන මට්ටම් වලට සාපේක්ෂව.
ගොඩේ හෝ posh වෙන්නේ එකිනෙකා ආශ්‍රය කරන සමාජ වටපිටාව, ජීවන රටාව ආදියට සාපේක්ෂව.
සිංහල, දෙමළ, මුස්ලිම් බර්ගර් හෝ බෞද්ධ හින්දු කතෝලික ඉස්ලාම් වෙන්නේ අනිත් කෙනා අදහන ආගමට නැත්නම් ජාතියට සාපේක්ෂව.
ඒත්...
අපි,
හොද හෝ නරක වෙන්නේත්,
වංක හෝ අවංක වෙන්නේත්,
චපල හෝ හෘදයාංගම වෙන්නේත්,
නපුරු හෝ අහිංසක වෙන්නේත්,
චරිතවත් හෝ දුශ්චරිතවත් වෙන්නේත්,
සත්‍යවාදී හෝ බොරුකාර වෙන්නේත්,
ආඩම්බර හෝ නිහතමාතී වෙන්නේත්,
මේ විශ්වය පාලනය කරන බලධාරීන් දෙන්නෙකුට සාපේක්ෂව.
ඒ තමා ලෝත පාලක ස්වභාව ධර්මතාවය හා අපේම හෘදය ශාක්ෂිය....
ඔබ සැමට සුභ දවසක්....